今日嘅世界盃流量密碼，肯定係日本反勝西班牙一戰。日本成為今屆第一支晉身淘汰賽嘅亞洲球隊（若唔計澳洲），更厲害係接連擊敗兩隊曾贏得世界盃冠軍嘅歐洲勁旅。這一晚，絕對係日本足球史上嘅CLIMAX NIGHT！
《CLIMAX NIGHT》，其實係日本著名City-Pop樂隊Yogee New Waves嘅經典作。雖然歌詞內容同日本贏波無乜關係，但歌曲嘅爽朗節奏、副歌部份醒神啦啦啦大合唱，真係好切合當下日本球迷嘅興奮心情。再聽埋「日本勝利女神」Shono所屬女子樂隊PARADOXX嘅強勁重金屬歌曲，各位日迷肯定High上加High。
客觀而言，今場日本隊表現未算好出色，勝在夠落力，把握到西班牙門將施蒙自信地荒失失傳球兼撲球失誤而追平。至於反超一球「波皮無出界」嘅爭議，相信球迷會講足一世；但如果三笘薫無出盡最後一口氣追波繼而傳中，就唔會有田中碧門前輕鬆破網一幕。
提起三笘薫，相信大家一定對佢喺3場分組賽未能正選上陣而忿忿不平（仲有南野拓實）。明明佢係全隊最具衝刺力嘅球員，加上踢開英超，體能上應可應付90分鐘。估計日本教練森保一係希望留力，待下半場先發力；但連對哥斯達黎加都留力，就真係令人摸不著頭腦（最後亦輸波而回）。不過勝者為王，日本隊今次奇蹟晉級，「森保名將」嘅神調動，大可媲美英格蘭戰術大師修夫基；作為英迷同日迷，我哋不要問，只要信就得喇。
（原文刊登喺2022年12月2日NowSports網站，現改成粵文版本）
