英冠亞軍錫菲聯事隔兩年重返英超，不過論注目度，肯定唔及由前曼城名將甘賓尼帶領、注入傳控踢法嘅冠軍般尼；開季前組軍亦未有太多動作，最為人關注嘅，肯定係學曼聯踢走迪基亞一樣，宣佈唔再跟球會老臣子前鋒比利沙柏（Billy Sharp）續約，來季大家睇唔到呢名錫菲聯Icon球員再戰英超。
見證球隊近年兩度降班然後再升班嘅沙柏，受訪時直言對今次被效力8年嘅錫菲聯放棄感到傷害。據知領隊赫京博頓本希望續約沙柏1年，唯球會高層另有看法。最新消息係另一主力前鋒伊利文尼戴耶（Iliman Ndiaye）亦考慮離隊，轉戰法甲馬賽。若一下子失去兩名前鋒，錫菲聯新一季肯定要買新人，瑞超球隊赫根的象牙海岸翼鋒查奧爾係佢哋頭號目標，另外邦比中場新星舒里文尼預料好快落實來投。
球員來來去去，其實係每間球會平常事，沙柏嘅離去，相信會令一眾錫菲聯球迷傷感，但球迷唔似球員，唔會輕言「轉會」，無論球隊經歷點樣嘅高山低谷，仍會意無反顧力撐到底。要講錫菲聯嘅名人球迷，The Beautiful South主腦Paul Heaton就係其中一人。
Paul小時候喺錫菲市成長，兩個哥哥支持錫周三，但佢鍾情外號「刀片」（Blades）嘅錫菲聯，更一度加入錫菲聯流氓球迷組織「Blades Business Crew」四出搞事；事後回想，佢當然感到自己昔日年少無知。
Paul雖然係超級球迷，但原來一直未有寫過關於足球嘅歌，佢去年受訪時笑言自己搵唔到題材去寫，但很享受利物浦球迷數年前將The Beautiful South名作《Rotterdam (Or Anywhere)》改詞，慶祝紅軍贏得歐聯。「如果錫菲聯能進軍溫布萊，或者我會考慮一下......」最終錫菲聯上季真係詮軍溫布萊球場作戰，可惜喺足總杯準決賽大敗予曼城；Paul亦未有兌現承諾，但如今愛隊再戰英超，佢會否慎重考慮創作一首足球歌曲，表達多年來對錫菲聯嘅愛？
（原文2023年7月12日於Now Sports網站上載，現稍作修改，並改成粵文版本）
