英格蘭嘅世界盃之旅終告結束，輸俾法國1︰2。比賽末段，簡尼未能射入第二球12碼，臨完場華舒福嘅罰球越眉而去，最終未能追平，賽果係令人傷感嘅，但奇怪我嘅心情唔係太傷感。
也許，係因為自1986年支持愛隊以嚟，自己所參透嘅格言︰沒有希望，就不言失望。英格蘭從來都唔係一線球隊，只要明白呢一點，一切就可以放開懷抱。不過呢一屆世界盃，我見到一點點唔一樣。
也許，係見到英格蘭嘅控球傳球比以往淡定。今場比賽即使好早失球，但眾將仍然穩打穩紮，藉住不停傳球尋找空位，然後靠個人技術突破。面對志切衞冕嘅法國，並未處於下風；獲加亦喺隊友協力下，將安巴比嘅威力壓到最低。數據係唔會呃人，全場英軍控球率、射門次數都比法國高，呢樣係以往唔能夠想像嘅事情。
也許，係見到薩卡、比寧咸、霍頓、華舒福、懷斯等一眾25歲以下新星嘅出色表現，令我感受到英軍世代交接嘅新希望；見到麥佳亞踢足咁多場無自爆，今仗更差啲建功，希望佢能將世界盃嘅狀態延續到曼聯，做一個令人放心嘅後備中堅。
對我哋英格蘭球迷而言，今屆世界盃已告結束。雖然未能超越上屆殺入四強嘅成績，但總算滿意收貨；當然，就算佢哋踢到「一劈屎」，我仍然會繼續支持下去。球迷，係從來唔會轉會嘅。香港以往有一隊樂隊Fantastic Day，結他手Chiwai曾毛遂自薦樂隊歌曲《For Tomorrow》俾英格蘭球隊樸茨茅夫喺比賽前播放，並獲答應 —— Chiwai係樸茨茅夫嘅超級球迷，就算球隊一度跌至英乙（現升回英甲），佢仍然義無反顧支持至今。《For Tomorrow》歌詞內容十分直接簡單，「I feel sick and tired / I’m looking for tomorrow」。今天，無論英軍上下，以及所有英迷，都好疲倦了；但明天又係新嘅一天，路仍然要繼續行落去。兩年後，歐國盃再見（前提係先要入到決賽周）！
（原文刊登在2022年12月11日Now Sports網站）
