來季英超最後一隊新升班球隊盧頓，相信老球迷一定記憶猶新。1980年代盧頓征戰英甲（當時最高級別聯賽），佢哋嘅人造草球場，常令唔少強隊陰溝裡翻船；到90年代初被足總勒令改回真草，然後球隊無耐便降班，一度跌落非聯賽作賽，等足31年至今，終於首次挑戰英超。
盧頓係英格蘭典型小球會，球隊嘅簡尼禾夫路球場因未符合英超規格而需改建，未能趕及開季時準備就緒，但無礙管理層積極擴軍，買入前曼聯球員陳達毅、借來曼城年輕後衛伊沙卡保希及簽下阿士東維拉借將拿甘巴等；最新消息係有興趣收購另一維拉球員、上季外借到屈福特時表現不俗嘅前鋒堅能戴維斯。
不過以波論波，單睇盧頓現時人腳陣容，喺英超無疑被比下去，更被視為降班大熱門；對球隊嚟講，新一季首要目標，就係避免做升降機。喺盧頓出生嘅英國老牌歌手Paul Young，本身都係足球迷；佢嘅名作除咗《Everytime You Go Away》，仲有翻唱澳洲樂隊Crowded House嘅《Don't Dream It's Over》，歌詞談及就算遇上困難，亦唔好放棄嘅大道理。
盧頓今次千辛萬苦升上英超，達成小球會大夢想；但英超同時係世界上最難踢聯賽之一，喺呢度借《Don't Dream It's Over》一曲鼓勵盧頓上下，新球季踢好每一場比賽，努力延續呢個英超夢想，絕不輕言放棄！
（原文2023年7月26日於Now Sports網站上載，現改成粵文版本）
