（文章配圖Photo Source︰楊哲維@當代電影大師Facebook）
（多謝林貓王介紹，令我喺2021年完結前，認識到當代電影大師）
當代電影大師（Modern Cinema Master），除咗樂隊名字唔太似樂隊名字之外，其他一切都好完美。
《陽台民謠》：一聽通電
佢哋完美喺邊方面？就係擁有令人一聽鍾情嘅魅力。由第一次聽到佢哋嘅《陽台民謠》嗰一刻開始，已立刻認定呢隊嚟自台北嘅獨立樂隊，喺往後日子，我必定會好好跟隨。
呢一份通電感覺，往往就係聆聽音樂最大興奮同樂趣。
一聽鍾情，有時好難解釋。我嘗試用《陽台民謠》分析。前奏不斷重覆嘅電結他和弦，令我諗起Stereolab嘅《Super Electric》，不過佢哋再喺和弦上加電結他Solo，但骨子裡都係同一脈絡。結尾長長音樂演奏，令我聯想到更多，包括Felt、Galaxies 500、草莓救星、甜梅號，仲有Fosca嘅《File Under Forsaken》。
《九零的天才》：佢哋嘅音樂啟蒙
無錯，聽當代電影大師，往往令我連結起好多以往鍾情嘅名字，呢方面同甜梅號之於我嘅感覺有啲似 ── 2001年我第一次聽甜梅號，發覺佢哋帶有好多後搖滾樂隊嘅影子 ── 咁講並非貶意，相反甜梅號能將佢哋喜愛嘅樂隊音樂人，兼收並蓄成為自己風格；佢哋嘅處男專輯《是不是少了什麼》，至今仍係我最愛唱片之一。
同樣，當代電影大師嘅音樂，亦俾到我呢份集大成感覺，更帶有濃濃九十年代搖滾氣息，難怪佢哋有一首歌叫《九零的天才》。有趣係樂隊試過將自己喜歡 / 曾喜歡嘅音樂名字，一口氣印喺招募結他手海報上。這份長長名單，如果有一半以上係你鍾情嘅，相信你會同我一樣，好自然一聽就愛上佢哋。
呢張海報，最終幫佢哋搵到結他手詠琪，同原有班底（主音兼結他手阿懋、低音結他手上杰、鼓手挺榕）組成現時樂隊三男一女陣容，亦促成《陽台民謠》曲末嗰段將會成為經典嘅雙結他演奏。
《那些事情是真的有意思嗎》：無錯，係無意思嘅
《陽台民謠》係當代電影大師2019年作品，收錄喺《拍譜》E.P.；碟入面四首歌曲明亮爽快，最佳例子係《最後一個海灘少年》，聽完真係好想去海灘，即使而家已經係冬天。同期佢哋仲推出另一E.P.《狀態》，曲風相對陰沉吵耳，近似美式Hardcore搖滾，其中一曲《那些事情是真的有意思嗎》已成為佢哋飲歌，長長嘅編曲，長長嘅說故事式歌詞，每一句都直白得令人汗顏。直接講，主旨同Radiohead嘅《Creep》大同小異，難怪呢首歌獲台灣新世代年輕人認同，我哋都唔想做歌詞嗰位平凡主人翁。只可惜，大多數人都唔能夠例外。
2021年年尾，當代電影大師推出處男大碟《告訴我他們都在本來的什麼地方》（Where Are We Now），如果之前兩張E.P.係迷你電影，咁呢張雙CD專輯就係Features Film，亦係佢哋野心之作。呢段日子，我幾乎每日不停聽住佢。佢絕對唔係一張開心專輯，唔少段落都令人好不安，但好奇怪，佢會令你越聽越沉溺，沉溺到一個點，我必須努力搖醒自己，轉聽其他較輕鬆嘅音樂，唔係我肯定會聽到癡線！
呢篇樂評，亦唔想鉅細無遺逐一點評碟入面15首作品，唔係我應該會寫到癡線。如果想知多啲呢張專輯，以及當代電影大師嘅創作分享，可睇睇「吹音樂」呢篇訪問：《當代電影大師談《告訴我他們都在本來的什麼地方》：你看不慣的事，最後會反映在自己身上》，相信會令你更深入了解佢哋嘅音樂同歌詞世界觀。我自己呢篇樂評，都係選擇零零碎碎記低一啲我對當代電影大師嘅感覺，希望能令你願意嘗試聽聽佢哋。不過聽之前要提提大家，阿懋演繹某啲歌曲時候，係近似典型中國搖滾樂隊嘅唱腔Style，但其實無乜大問題，就如老王樂隊主音聲線似迪克牛仔一樣，聽慣咗接受到係OK無問題嘅。
《我不想聽我不想聽被寵壞的搖滾明星》：我只想聽你哋
《告訴我他們都在本來的什麼地方》嘅雙CD編排，亦好似先前兩張作品嘅風格延續，CD1繼承咗《狀態》嘅急激，開場曲兼同名點題作，同埋緊接嘅《我不想聽我不想聽被寵壞的搖滾明星》同樣擁有密不透風嘅旋律及歌詞，已為專輯嚟個下馬威：如果呢兩首歌你接受唔嚟，請快啲㩒「停」然後離開，返去你自己嘅世界。留下來嘅，你會同我一齊，繼續被《我逆著走》、《我看見庸才自命不凡》、《我要殺光浪漫殺死詩》、《我知道他們是假貨》、《如果你是詩》呢堆曲式急激得喘唔過氣、歌詞充滿批判意味嘅Hardcore / Punk / Noise / Rock作品征服，聽得大呼過癮、欲罷不能。要將呢堆作品歸類，Fugazi會係好好嘅比擬，某啲片段亦令我諗起The Rapture（早期）同Ikara Colt。
《年輕民謠》：格格不入嘅世界
CD2大致繼承咗《拍譜》嘅爽勁，開場曲《透明的孩子》短小精桿，直接地間接唱出佢哋深受台灣樂隊透明雜誌影響；完場曲《胸毛之歌》由詠琪獻唱，同樣短小但唱到走調，十分搞怪。《明芬》、《羅馬假期》同《年輕民謠》嘅爽快節奏，配合風馳電掣嘅電結他彈奏，聽開搖滾音樂嘅樂迷，很容易就會愛上。尤其《明芬》同《年輕民謠》末段非常精彩嘅長長音樂演奏，四位成員喺編排雙結他Solo、同低音及鼓嘅平衡配合，真係處理得好出色，凸顯佢哋之間嘅無形默契。仲有，當讀到《年輕民謠》呼應大碟標題嘅歌詞︰「到那只有我們知道的地方吧，路途遙遠我們也不害怕去，你想要去的地方，只有我們知道的地方……」每位自覺同世界格格不入嘅年輕搖滾樂迷，點能夠唔鍾意呢首歌鍾意到死呢？
兩首《你說台北的天氣好冷》同《我覺得春天好像要來了》節奏稍為放緩，帶出樂隊感性一面，嗰啲乾乾嘅電結他掃撥，容我穿鑿附會，確實係好典型嘅後搖滾流行曲格式，亦係我一直所喜愛。
《長歌》：唔係龐克，唔係後搖滾，乜都唔係
繼承以往《那些事情是真的有意思嗎》同《陽台民謠》嘅長篇搖滾，新碟亦有長超過11分鐘嘅《長歌》。從樂隊訪問中得知，佢哋嘅創作過程非常艱辛，三年嚟左改右改多番折騰先至完成，或者對佢哋嚟講仍未算滿意。自己一開始聽此曲，亦覺有啲怪怪，好似想表達一啲嘢，但表達得未夠圓滿；但越到後段，歌曲嘅味道終於慢慢滲出嚟；呢段日子反覆聽過無數次後，令我開始接受《長歌》係一首架構完美但留有遺憾嘅唔完美佳作：「如果他是一個龐克，不是因為，他想成為一個龐克。而是因為，他什麼都不想成為啊……」
《你說台北的天氣好冷》：這裡更冷
完美同唔完美，兩者可以並存咩？《告訴我他們都在本來的什麼地方》話我知係可以嘅，因為收錄咗唔算完美嘅《長歌》，先能夠成就當代電影大師呢張完美嘅處男專輯，概括出樂隊嗰份冷酷但有時溫暖嘅青年人獨有嘅疏離感。佢勾勒嘅風景，就好似二十年前甜梅號《是不是少了什麼》俾我嘅感覺一樣，驟眼睇好似外國，原來係深夜台北孤清街道，遠處有一個人企喺度，我行到佢面前，聽見佢喃喃自語唱住：「你說台北的天氣好冷，冷冷的剛好降低你的體溫……你說車窗兩旁的窗簾，都好像吊起來的人，你不喜歡他們……你說不活著，就不活著……」
台北，一個親切但唔屬於我嘅城市，但疏離感係共通嘅。香港呢邊天氣都好凍，應該比台北更凍。
