世界太混亂，夏天超炎熱翳悶空氣，尤其令我頭暈。唔想上街，唯有匿喺屋企聽歌，Youtube大數據彈咗楊將軍之苦茶新歌《風花雪月》俾我聽。
可能你係第一次聽到楊將軍之苦茶（Bitter Tea Of General Yeng）依個名字，在此不厭其煩介紹多一次。楊將軍上世紀80年代組成，係旅居加拿大嘅香港樂隊，其中兩位成員Patrick Chan同Eric Tam，曾跟劉以達創立DLLM。楊將軍自資出過兩張EP《Heatwave》及《Contempt 輕蔑》，然後便消聲匿跡，直至兩年前。
兩年前，楊將軍之苦茶低調地將《Contempt 輕蔑》重新發行（串流與實體皆有），其後又發表30多年來新作《In A Foreign Place》。今個夏天，他們再有新作《風花雪月》及B-Side純音樂《寶麗來》面世，兩首同由Patrick獨力完成，但歌曲Cover攝影及設計有楊將軍另一成員Annie幫手。
《風花雪月》最特別之處在於，佢係楊將軍第一首Cantopop，更以口語化粵語入詞，而非普遍用嘅書寫語 —— 「聽住大話，要笑多啲／黐人夢話，係冇意思／講一套，做一套。」
口語化粵語入詞（唔計Rap），最出名當然係許冠傑及黎彼得當年合寫一大堆市井流行曲，例如《半斤八兩》，還有尹光鹹趣歌：「雪姑七友七個小矮人，雪姑七友七個齊齊瞓」。80年代相對較少出現，記憶中林振強寫得較多，例如《吖嗚婆》、《愛到發燒》。90年代有軟硬天師、....Huh!?嘅《究竟應該點？》做代表；千禧年後，黃偉文同伍樂城曾發起「新廣東話歌運動」，二人為李彩樺寫嘅《你唔愛我啦》一度紅爆（Cult爆）全城。近年就以南洋派對最搶Fo ：「啲朋友個個都問我去邊度買衫？我話喺地鐵站轉角出口嗰度有一間！」
楊將軍嘅《風花雪月》，歌詞上，基本上同以上提及歌曲同類。惟先天上，楊將軍屬獨立樂隊，旋律同編曲取向，同主流Cantopop有所分野 ——《風花雪月》每句旋律都較短，副歌亦非呼天搶地搶耳Style，起伏唔太大，所以就算用廣東話入詞，感覺唔會太突兀。
好多人以為用粵語書寫創作，感覺會好累贅；但其實只要好好善用，粵語可以非常意簡言賅、靈活多變。《風花雪月》歌詞，重點在一個字：「佢」。粵語中嘅「佢」，已可同時代表他、她、它、牠、祂。楊將軍Patrick自嘆「歲月催人，只有青春嘅一群，總會見返佢」。依個「佢」，究竟講緊邊個？再細讀歌詞其他段落：「對面嘅大廈，依個畫面／日日見住，冇乜新鮮／但一變，就不見／過去，好多年，我哋同佢手雙牽／但今天已不再」。相信依個「佢」，大家已心神領會，不言自明。
楊將軍Patrick首度挑戰創作廣東歌，我輩樂迷聽到著實驚喜萬分；但《風花雪月》沒有一般Cantopop詞大於曲嘅通病，佢嘅音樂同樣出色，開首充滿Post-Punk張力嘅電結他已非常搶耳，再配上Lo-Fi的士高節拍，彷佛一下子返番去80年代美好Underground Music年代。末段接近2分鐘純音樂演奏，接上一段非常有型嘅低調電結他獨奏，成功再次征服我。
當然我亦唔可以遺忘《風花雪月》嘅B-Side《寶麗來》。一睇歌名，立時已聯想到Japan嘅《Gentlemen Take Polaroids》；樂曲的確令人聯想到Japan後期嘅純音樂，同時帶有YMO式東方電子色彩。中段嘅電結他Solo，Patrick表示有向Bill Nelson取經及致意。整體出嚟效果，令我覺得《寶麗來》好比DLLM久休復出新作，延續著Patrick、Eric、劉以達三位年輕小伙子，當日堅持獨立原創純音樂嘅初心。
首度挑戰廣東歌，楊將軍Patrick已善用粵語靈活多變特色，用字方面固然可以進一步再雕琢啲，務求更啱音。不過Indie-Pop不同於Cantopop，向來感覺行先，就算唔啱音，唔一定要改歌詞，可以改旋律改唱法都得，就同粵語一樣Flexible。成軍30多年，Patrick曾自嘲楊將軍無乜叫座力，但何解仍然繼續出歌，仲唱埋廣東歌？聽完《風花雪月》，聽完《寶麗來》，我感受到Patrick仍然有啲嘢想講，亦想做一啲香港好少人做嘅音樂，原因或者就係咁純粹、簡單。
對我自己而言，能夠事隔30多年後，可以聽返楊將軍如此出色音樂（《Contempt 輕蔑》真係一張超水準經典），到後續今天他們還有新作面世，的確令我無比感恩；套用《風花雪月》一句歌詞，「總會見返佢」。Please wait, don't lose faith, I know it's gonna happen someday，歲月縱催人，仍要常存希望，大家一齊鬥長命。
