（原文刊登於2003年《mcb》，現版本稍作修改，並改成粵文）
總覺得林一峰係介乎主流與非主流之間嘅音樂創作人，既為一眾主流歌星炮製大量Cantopop（Cookies《Forever Friends》金句「My pen is blue」），又曾經同少爺占等人組過3P樂隊；佢嘅個人作品，亦上載喺台灣獨立音樂網頁「滾石可樂」俾人試聽。
一峰音樂上嘅「左右逢源」，令人好難為佢介定身份。不過，咁又有乜所謂呢？最重要係，佢能為本地樂壇創作出優秀廣東流行曲，喺既定唱片製作模式中努力加入唔同新鮮元素，已經好好。
早喺10多歲讀書時候，一峰已開始創作，至今完成嘅旋律不計其數。多年嚟，樂迷對佢嘅印象都離不開幕後創作人，又或少爺占音樂夥伴之一。直至最近，一峰靜悄悄推出首張個人專輯《林一峰的床頭歌》，大部份作品都由佢親自作曲、填詞及編曲，試範何謂真正嘅唱作歌手。
喺圈中打滾多年，點解到而家先才推出自己專輯？
一峰：「其實我認為我唔能夠做幕前歌手，我比較鍾意創作人呢個身份。所以我唔係太想標榜呢張係一張個人專輯，反而傾向係一個Project。至於點解會有呢個Project，係因為眼見近年香港有太多不滿、太多怨氣、太多鬧人嘅嘢，將一啲唔好嘅事無限放大。返番去呢張專輯，我希望將一啲美好事物放大，我想將樂迷嘅焦點放喺呢啲美好事物上，而唔係我，林一峰。」
咁點解專輯會選擇走Acoustic路線？呢個係咪你最喜歡嘅音樂風格？
「我喜歡嘅音樂有好多種，Acoustic只係其一。選擇玩Acoustic、Folk-Pop路線係因為夠簡單方便，手到拿來拎起結他彈奏就得。其實曾有一段時間，我好想迴避民歌呢個字眼，覺得（喺香港）民歌已被污染，變成好中上階層嘅玩意。但民歌本質係對生活嘅反思，我認為喺眾多音樂類別中，佢係最有生命力一種。民歌善用我哋身邊（有限）資源，訴說我哋身邊事物。佢係最簡單嘅。」
無錯，專輯內10首歌曲風格非常簡單統一，以及帶有濃濃70、80年代Folk-Pop色彩，以簡潔結他彈奏及編曲，配上一峰帶少少女性化嘅高嗓音。以中文歌嚟講，除咗去年2003年「在草地上」嘅《微笑》E.P.以外，《林一峰的床頭歌》可以話係近年本地最具民歌精神嘅專輯。
我認為一首出色民歌，首要條件係旋律夠悅耳、長青，好似Simon & Garfunkel嗰一種；其次係歌詞夠生活化。以一峰歷年嘅創作經驗，要作一段美妙動聽嘅旋律不太難，聽聽碟內歌曲便知一二；歌詞方面同樣符合民歌要求，好似《突然獨身》以日常生活片段描寫失戀後獨身嘅經歷：「家中開支縮減一半應該可以慶祝／牙刷一雙多刺眼的溫馨。」另一首《青草地，溪水旁》，單看歌名已感受到曲中那綠油油嘅Folky感覺。《雪糕車》更令人完全返番去80年代情懷：「每當聽到雪糕車靠近／功課也溶掉／紅綠燈飛機一起跳。」
「《雪糕車》係去年我喺克羅地亞旅行時寫。寫嘅時候已是凌晨2時，嗰一刻我正一個人四圍搵巴士，嗰一刻我好想食嘢，但語言上又同當地人溝通唔到，結果搵咗好耐好耐先上到巴士，安坐後忽然有好多靈感浮現腦海，好快就寫咗呢首歌出嚟。曲式我覺得好似Simon & Garfunkel嘅《Boxer》，只係香港好少人會做呢類型音樂。《突然獨身》係為一本即將出版嘅同名小說而創作，我想先行推出，希望帶嚟一啲迴響。呢兩首歌同樣係為呢張專輯而新灌錄，其他八首就係一早已做好錄好嘅作品。」
當中佔咗四首係少爺占廣播劇歌曲、兩首屬電影《天使》嘅歌曲。由At 17唱紅嘅《The Best Is Yet To Come》，專輯同時收錄一峰親自演繹嘅版本。唯一一首唔係佢創作嘅，係翻唱林子祥嘅《追憶》。一峰呢個新世紀New Acoustic Version，喺簡約結他和弦下，原本濃得化不開嘅傷感歌詞，現已沖淡成薄霧一片嘅淡淡哀愁，多咗一份冷靜過後嘅勇敢面對想法。
「回望唔一定代表追悔。如果無過去20多年嘅我，就不會有而家呢個我。所以回望過去其實係好事，視乎你點樣回望。正如點解我會翻唱《追憶》，因為大家面對過去時候，總係追悔埋怨：點解我會認識佢？然後點解我會同佢分手？但如果無晒呢啲問題，而家嘅你就唔會存在，可惜好多人都睇唔透呢一點。」
《追憶》同《The Best Is Yet To Come》應該係專輯內最重要兩首歌曲。正如一峰為翻唱前者所作嘅註解，同佢製作呢張專輯嘅背後意念如出一轍 —— 將美好事物放大。原來我哋追悔、我哋悲傷，同時係肯定緊自我、肯定緊人生。因為唔快樂而快樂，好似非常自相矛盾；但，當我哋願意抽離去睇，正正因為我哋希望人生充滿美好快樂，所以每當遇上挫折或障礙，我哋就會唔開心。如果我哋從來都唔著緊人生，快樂不快樂又有乜所謂呢？正如《The Best Is Yet To Come》最後一句歌詞：「最好的尚未來臨。」點解我哋唔開心？只因為我哋心中最深處，都會希望，最好的尚未來臨。
「《The Best Is Yet To Come》嘅歌詞內容，並唔代表我嘅人生態度……正如我一開始講，呢個世界實在有太多太多唔好嘅嘢，所以我哋要將美好事物無限放大，所以我就將自己最好一面放大出嚟。」
照咁講，《The Best Is Yet To Come》就係你想要嘅人生態度？
「無錯！」
咁做唔做到？
「仍未呢，哈哈！」
一峰係個健談嘅傢伙。今次同佢做訪問，感覺更似傾偈。我哋仲傾咗好多關於旅遊嘅不關事嘅嘢（佢好鍾意旅行），佢亦透露遲啲會同The Pancakes、The Ketchup、梁翹柏等合作（預計將於年內推出），喜歡一峰嘅樂迷不妨留意。
整個訪問入面，最深刻嘅一句說話係「有啲音樂係唔能太大眾嘅」。所以呢張專輯，佢只交俾唱片公司發行，其餘一切公關宣傳欠奉。不過只要有心人，我相信都一定能聽到佢呢堆床頭歌。「起呢個碟名，因為呢張係一張好私人嘅專輯，就好似放喺床頭嘅嘢，好個人嘅。」一峰選擇將呢啲私人感受，以音樂形式表達出嚟，你能體會到佢嘅私密心情嘛？追憶並唔可恥，因為唔快樂背後，正代表我哋渴望快樂；最好的尚未來臨，因為渴望快樂背後總係隱藏住巨大悲傷。能夠將一切悲歡喜樂睇得如此澄明通透，我們如此很好啊。很好，寫完呢篇稿後，我好想去㬵瞓一頓甜美嘅覺。
（2023年後記：原來《林一峰的床頭歌》已面世20周年！搵返20年前呢篇舊文，再聽返20年前呢隻碟。記得當年我好鍾意碟內《19》一曲，不過內文無提及，歌曲嗰份青蔥歲月嘅成長傷感，人大後重聽，彷如預言書一樣看見今日嘅自己。
文章標題取自林一峰為佢妹妹寫嘅《陪你失眠》，一峰自己都有唱過，我當年聽嘅係英文歌詞版本，應該係喺「滾石可樂」度Download，好好聽的，可惜網上已搵唔返，唯有聽住中文版補數啦。）
