（原文刊登喺2003年《mcb》，現版本稍作修改）
早前Nude唱片公司結業，曾係旗下重要名字嘅Black Box Recorder，動向一直令人揣測，但唔算擔心。畢竟樂隊先前2張專輯《England Made Me》同《The Facts Of Life》都叫好叫座，應該唔會好似Gloss咁自今仍然係無主孤魂，乏人問津。果然，經過3年多沉寂後，BBR現已簽約One Little Indian，並推出最新專輯《Passionoia》。惟估唔到BBR唔單止轉咗唱片公司，連音樂風格亦劇烈轉變！
最先發表嘅細碟《These Are The Thing》，你想像到呢首係BBR作品嗎？Upbeat嘅電子節拍、熟練嘅電子音效處理，根本係一首徹頭徹尾嘅Electroklash作品！配上超流暢嘅旋律同主音Sarah Nixey超性感演繹，絕對可媲美Ladytron嘅美妙電子流行曲！
其實早喺上張《The Facts Of Life》，BBR已局部披上一層薄薄Trip-Hop外衣，不過嗰時電子元素只係額外點綴。嚟到呢張《Passionoia》，BBR卻完完全全以電子做主導。開場曲《School Song》活脫係Saint Etienne早期嘅輕盈電子風格，歌詞大唱「Black Box Recorder / This is the school song」，會成為樂隊團歌嘛？《GSOH Q.E.D.》同《Big Number One》擁有跳躍電子音符；《The New Diana》同《I Ran All The Way From Home》則帶點上張專輯嘅Trip-Hop風格，但感覺更清晰；慢板作《Girls Guide For The Moderna Diva》同《British Racing Queen》係專輯最動聽2首作品，尤其後者嘅晶瑩剔透琴音，靚到令人飄浮喺天空中。BBR再次證明電子音樂，都可以充滿人性化感情。
唔知BBR點解突然轉走電子音樂路線，可能2位男隊員Luke Haines同John Moore買咗一批電子器材啩。無論乜嘢原因都好，《Passionoia》本身嘅高水準表現已無容置疑。呢隻碟係至今為止本年度我心目中最動聽嘅Eletrop-Pop專輯，比Erlend Oye嘅《Unrest》更出色，因為我認為女聲唱流行電子，從來比男聲更匹配！
