呢篇係一篇遲嚟嘅影評，如果個天可以俾我返轉頭，我一定會……
由澳門「飛夢映画」製作嘅《熱唱吧》，上映至今已超過一個月，但其實電影早喺兩年前已拍好，一直等待適合時機同條件發行公映。最終安排喺早前暑假尾上畫，絕對唔係靚檔期，放映後迴響亦唔算太大，輿論大多都認為電影有唔少瑕疵同不足，不過普遍都肯定「飛夢」嘅熱誠。
呢篇唔係一篇專業嘅影評，不過我想用呢篇文章，嘗試去明白並了解《熱唱吧》嘅出現，以及佢對「飛夢」仝人嘅意義。
拒絕聽話如木偶
《熱唱吧》導演勞嘉濠講過，當日啟發佢哋拍呢套戲，源自多年前一單校園新聞，一位澳門學生喺歌唱比賽唱粗口歌而被記過踢出校。事件中學生本人堅持自己無錯，學生阿爸卻持完全相反意見。勞嘉濠認為當中顯示年輕同年長兩代之間衝突，係好好嘅拍攝題材。《熱唱吧》亦成功將呢段新聞融入劇情，成套戲就透過不斷嘅世代衝突（父母vs子女、校長vs老師 / 學生），道出兩位主角熱血追夢嘅故事。
為了理想目標 我會做到
（以下有少量劇情透露）
世代衝突，以至階級、權力、兩性衝突，正正係「飛夢」近兩年喺Youtube發表嘅大量劇情短片入面，一個非常Core嘅取材元素，然後再以搞笑、鹹趣、抽水、隱喻等方法呈現。有睇開「飛夢」嘅Fans或者會覺得《熱唱吧》相比之下太正經太正路，其實兩者大方向都係殊途同歸。大家亦要明白「飛夢」拍完呢套戲後，因為苦無機會上映而轉為主力拍Youtube，希望儲多啲Fans。所有嘢都係means，目的都係為圓佢哋嘅電影夢。
小角色都有力量去出走
亦正如電影兩位主角，老師張智仁（周國賢飾）、學生劉玉芳（陳慧敏飾），一直努力嘗試追尋佢哋嘅音樂夢，當中有熱血、魯莽、堅持同最後嘅妥協。無錯，現實世界就係充滿種種妥協；有時妥協到一個點，隨時連自己嘅初心都忘記晒。所以電影Slogan係「不忘初心」，所以電影結局係劉玉芳決定任性多一次──我諗起《月黑高飛》主角Andy犯禁播意大利女高音黑膠俾全監獄人聽一幕，同樣係喺生命中一剎那撻著，決定玩嘢挑戰權威，做自己認為值得、並希望感染身邊人嘅有意義嘅事。
當然，攞《熱唱吧》同神戲比，隨時會俾人屌；事實上電影兩位主角只係小人物，並非《月黑高飛》Andy嗰種神一樣主角，可以做到啲好勁好勁嘅事；佢哋只能夠喺自己能力範圍底下嘗試反叛，其實已經好難得。
致敬求叔
小人物，亦係「飛夢」一路創作以嚟好常用嘅角色設定，呢方面相信係受周星馳影響。所以細心啲去睇，《熱唱吧》有唔少細節都幾好睇，已故嘅黃樹棠演得好好，戲外佢亦為電影出唔少力（免費做武指），又同「飛夢」拍搞笑短片（《我唔止和殭屍有個約會》佢再演驅魔大師求叔，短短八分鐘內不斷狂抽水，屬高水準網片示範）。佢哋用實際行動證明，世代衝突係可以唔存在嘅，只要大家願意放下身段，嘗試了解彼此。
潛航到底 哪怕極暗
寫到呢度，連我都覺得好正能量，唔似我一貫喜愛風格。《熱唱吧》擺明就係一套正能量電影，結局由男女主角獻唱嘅主題曲《天高海深》，亦係一首比《海闊天空》更加正能量嘅勵志歌。我絕對明白部份「飛夢」Fans會覺得套戲唔太對路，但希望大家了解到，《熱唱吧》唔止係一套電影咁簡單，背後代表住「飛夢」一路以嚟嘅追夢過程。只要細心啲去睇去聽，《熱唱吧》／《天高海深》並唔係政府宣傳短片嗰種陳腔濫調正能量，而係切切實實體現社會上每個小人物點樣爭扎求存、嘗試努力堅持，然後被社會擊敗。
「小角色都有力量去出走，闖出去，未怕輸， 參加戰鬥」。無錯，「飛夢」㒰人一直都喺度玩命，無論喺內容上（老表抽水系列）定行動上（電影已死但偏偏夠膽死拍長片）。歌詞最後一句「是我最好時光，哪懼浮沉」實在令人聽得心噏，但同時又充滿希望，我好鍾意呢一份矛盾感覺。如果有網民將「飛夢」仝人嘅網片演出片段Collage剪輯成《天高海深》MV，最後以《熱唱吧》結局一幕作結，相信出嚟效果絕對係Perfect Match，睇完我一定會感動到喊。
可不悔當初
《熱唱吧》可唔可以做得更好？兩年後事後孔明去睇，當然可以，但正如政府宣傳片都話「生命無Take Two」，我嘗試學習欣賞呢齣電影嘅不完美，可接受，要改善。可以咁講，如果無《熱唱吧》，就唔會有大家都好鍾意嘅老表，甚至麗珍。勞嘉濠受訪時亦有講，如果俾佢返轉頭再嚟多次，佢哋仍然會堅持拍長片；「飛夢映画」本身呢個名，就係一間電影公司，多於一個Youtube網台。
如果，真係可以返轉頭重拍《熱唱吧》，真係可以修正返所有瑕疵同不足，咁呢套唔會再係《熱唱吧》，而變成另一齣電影。「有時候，當我哋好努力去追求自己嘅理想，但喺現實生活入面，好多人都係唔成功，或者會有好多遺憾；但其實喺過程入面，你都會搵到一樣好緊要嘅嘢，就係你嘅初衷。」The end is the begining is the end，期待「飛夢」下一齣電影，聽講會係一套犯罪喜劇。
