（感謝Houses Cheung嘅影評〈越過貧富界線的酸餿味〉，令我對《上流寄生族》有另一層解讀，啟發我寫呢篇文章。）
我認為，未睇《上流寄生族》嘅香港人，應該馬上買飛去睇。
奉俊昊新作《上流寄生族》，一套密不透風、全程令人抖唔到氣嘅電影。劇情節奏推進之緊湊，好比星爺早期作品啲密集笑位，同樣經過精心設計。唔同嘅係，導演奉俊昊除左令你笑，仲令你哭笑不得。
奉俊昊嘅電影，從來唔鍾意畫公仔畫出腸，《上流寄生族》好似有啲唔同：電影開宗明義講貧富懸殊，戲入面所有情節、人物、場景、動作、對白，全都服膺於呢個主題。點解佢要寫得咁白？
因為貧富懸殊呢個題目，係非常非常非常之重要。戲入面，富爸爸李善均唔止一次講過，貧窮同富有，中間隔住一條界線。點樣分辨？就係靠窮人身上嗰陣除。
咁直接了當嘅比喻，奉俊昊就係想觀眾明白，佢呢套戲想講乜。等唔切啦，佢要所有人睇完之後，明白到貧窮同富有、無權同有權，呢個世界就係咁運作。等唔切啦，我哋唔可以再自欺欺人，尤其係我哋呢啲無權無勢嘅人，必須要清楚明白了解，呢個係一個點樣嘅世界，我哋先可以繼續行落去。
（以下內容透露部份劇情）
戲入面，窮爸爸宋康昊一家四口因緣際會，加上小聰明，成功入屋為富爸爸李善均一家打工。話佢哋寄生，其實不太盡然，佢哋係有能力嘅。例如做司機嘅宋康昊手車好穩陣；阿女樸素淡亦成功治到極度活躍嘅富家寶貝仔tup tup掂。可見窮爸爸一家絕非黐飲黐食之徒，佢哋只係欠缺向上流嘅機會。
對唔住，應該係絕對沒有向上流嘅機會。話佢哋寄生，其實好貼切，俾著你同有錢佬打工又點，就算服侍到老細tup tup掂，喺佢哋眼中，你哋只係一班幫佢哋打工、靠佢哋至生存到嘅奴隸。無論人類社會點進步，貧窮同富有、無權同有權，呢條界線到今日依然存在。窮媽媽張惠珍一句對白「如果我好有錢，我都可以係個好人」，一矢中的道出有錢、有權勢嘅人嘅偽善。
無權者，點至可以跨越嗰條界線？電影結局，奉俊昊先後提出兩個可能。先講後一個，就係竭力令自己成為有權者，即所謂人窮志不可短，無錯係好老土，導演亦覺得不切實際。我認為，就算真係俾你成功向上流，最後你隨時亦只能服膺於制度，成為昔日自己討厭嗰種人。
另一個可能，就係暴力。
沒有計劃，就係最好計劃。宋康昊最後被逼入窮巷，佢喺最後關頭，選擇時窮節乃見，不惜一切，捍衛自己、捍衛家庭、捍衛窮人、捍衛無權者最後一分尊嚴。
呢個世界就係咁醜惡，我哋要面對現實，我哋先至可以行我哋嘅路。
～劉俊雄《天與地》
